Tekur Reykjavík forystu í rafbílavæðingu?

Ég held að við höfum alla burði til þess og nú hefur umhverfis- og samgönguráð tekið utan um verkefnið. Starfshópurinn mun líka skoða tækifæri í öðrum vistvænum orkugjöfum. Hér er frétt um það:

"Reykjavík stefnir að því að verða forystuborg á heimsvísu í rafbílavæðingu. Umhverfis- og samgönguráð stofnaði í dag starfshóp sem á að finna leiðir til að ná þessu markmiði eins fljótt og auðið er. Kjöraðstæður eru taldar vera fyrir hendi í Reykjavík til að gera borgarbúum fært að reka rafbíla í borginni á hagkvæman hátt.

Samgöngur er helsta uppspretta losunar gróðurhúsalofttegunda í borginni og hefur mikil áhrif á loftgæði. Kosturinn við raforkuna sem knýr bílana er að hún er innlend, endurnýjanleg, ódýr og einnig mun draga verulega úr loftmengun og losun gróðurhúslofttegunda. Aðstæður þurfa vera með því móti að auðvelt verði að hlaða bílana hvort sem er heima fyrir, í vinnunni eða annars staðar í borginni. Starfshópurinn mun meðal annars gera áætlun um rafbílavæðingu og kanna aðstæður til að innleiða hleðslukerfi í borginni.

Lagt er til í tillögunni að starfshópurinn verði skipaður fulltrúnum meiri- og minnihluta ráðsins. sérfræðingar af Umhverfis- og samgöngusviði, háskólastofnun og fulltrúa Orkuveita Reykjavíkur munu eiga aðild að starfshópnum. Jafnframt verður samgönguyfirvöldum boðin þátttaka. Hópurinn á að skila skýrslu ásamt tillögum í mars 2010. "

Mér finnst þetta flott

Mér finnst þetta flott, skemmtilegt og nauðsynlegt.

Á vef borgarinnar er eftirfarandi frétt.

"Reykjavíkurborg leitar nú leiða til að nýta fjármuni borgarinnar sem best og draga saman í rekstrinum án þess að skerða grunnþjónustu, hækka gjaldskrár og fækka störfum.

Í fyrra var leitað til starfsfólks og óskað eftir hagræðingarhugmyndum fyrir  fjárhagsáætlun 2009. Starfsfólk lét ekki sitt eftir liggja og fram komu um 1500 tillögur til hagræðingar, af þeim komu strax til framkvæmda um 300 þeirra og enn er verið að vinna úr fjölda hugmynda og verkefna. Reykjavíkurborg hefur nú verið tilnefnd til verðlauna fyrir nýsköpun hjá Samtökum Evrópuborga (Eurocities) fyrir þetta verkefni og verða úrslitin kunngjörð í lok nóvember.

Í ljósi þessa frábæra árangurs leitum við ekki aðeins til starfsfólks heldur borgarbúa allra og óskum eftir tillögum um leiðir til hagræðingar. Allar tillögur stórar sem smáar eru vel þegnar og rétt er að minna á að margt smátt gerir eitt stórt."

Smelltu svo hér til að senda inn hugmynd.

 

 

Ferskar og góðar hugmyndir í Reykjavík

Í ferðaþjónustunni eru mikil sóknarfæri fyrir Reykjavíkurborg. Fyrr á þessu ári var samþykkt í borgarstjórn Reykjavíkur að skoða þau. Menningar- og ferðamálaráði var falið að skipa starfshóp sem hefði það verkefni ásamt því að skoða hvernig efla mætti kynningu og markaðssetningu á Reykjavík sem áfangastað ferðamanna. Þá skyldi einnig skoðað með hvaða hætti Reykjavíkurborg getur hvatt til nýsköpunar og eflt vöruþróun í ferðaþjónustu í Reykjavík. 

Í starfshópnum áttu sæti fulltrúar frá menningar- og ferðamálaráði Reykjavíkur, Höfuðborgarstofu, Nýsköpunarmiðstöð, Útflutningsráði og SAF (Samtökum ferðaþjónustu). Niðurstaða starfshópsins sem skipaður var í kjölfarið var að halda opið hugmyndatorg og bjóða þar öllum sem vildu að leggja til hugmyndir um hvar sóknarfæri leyndust. Gætt var að því að hafa aðgengi gott og tekið var við hugmyndum bæði munnlega, rafrænt og bréflega, allt frá bréfsnifsum að ítarlegri skýrslum. Bárust um 70 hugmyndir til hópsins.

Sjö verkefni hlutu styrki, en styrkupphæðin var um 7 m.kr.  Í starfshópnum fóru fram góðar umræður. Meðal annars sú að mjög mikilvægt sé að draga fram þá kosti og auðlindir sem borgin hefur upp á að bjóða nú þegar. Einnig að að auðvelda og auka tækifærin fyrir aðila í ferðaþjónustunni með góðu framboði af alls kyns afþreyingu fyrir ferðamenn. Val verkefnanna er byggt á þessum gildum.

Sjö verkefni hlutu styrk:
1) Vatnavinir hlutu styrki til að þróa áfram hugmyndir um  fjölbreyttari baðmenningu í Reykjavík. Vatnavinir vilja leggja áherslu á náttúruupplifun innan borgarmarkana og þannig auka fjölbreytnina og styrkja ímynd Reykjavíkur ennfrekar sem „Heilsuborg”.
2) Þórdís Ágústsdóttir hlaut styrk til að vinna að Ljósmyndasýningu í Reykjavík sem haldin verður í fyrsta sinn árið 2011 Verkefnið felst í því að skipuleggja ljósmyndahátíð í Reykjavík og gera borgina að suðupotti sköpunnar og umræðu um ljósmyndun.
3) Fyrirtækið Náttúran.is hlaut styrk til að hanna og þróa grænt Reykjavíkurvefkort sem
dregur grænu kostina í borginni sérstaklega fram, s.s. hjólastíga, náttúrugöngur, vinnustofur listamanna, þráðlaust net, kennileiti tengd vatni, náttúruleiksvæði ofl.
4) Inga Jessen hlaut styrk til að hanna og viðhalda vefsíðunni Freecitytravel.com – vefsíða þar sem ferðamenn geta nálgast fjölbreyttar upplýsingar um ókeypis afþreyingu í Reykjavík á einum stað.
5) Sigurður Hall hlaut styrk til að koma upp og viðhalda íslenskri sælkera matarsíðu byggðri á og tengdri Food and Fun hátíðinni. Markmiðið er að kynna Reykjavík sem heimsklassa matarborg. Vefsíðan verður tengd öllum þeim matreiðslumeisturum sem tekið hafa þátt í Food and Fun og íslensku veitingastöðunum.
6) Valgeir Guðjónsson hlaut styrk til að setja á svið sýningu fyrir erlenda ferðamenn sem ber heitið: Iceland in reverse: A musical journey from present Iceland to the past. Þetta er sýning með leik og söng um sögu Íslands.
7) Hönnunarmiðstöð Íslands hlaut styrk til að efna til samkeppni um Reykjavíkurminjagrip. Þess má geta að samkeppnin er hafin og þeir sem hafa áhuga eru beðnir að kynna sér málið á vefsíðu Hönnunarmiðstöðvarinnar. Keppnin er öllum opin og felst í því að hanna nýjan og einkennandi minjagrip fyrir Reykjavík. Verðlaunatillagan skal endurspegla vörumerki Reykjavíkur sem ferðamannaborgar, Reykjavík - Pure Energy. Vörumerkið vísar til þeirrar hreinu orku sem sem Reykjavík býr yfir í fleiri en einni merkingu: í náttúrunni, vatninu, menningunni og sköpunarkraftinum.

Það er afar ánægjulegt að Reykjavíkurborg skyldi stíga þetta skref til eflingar nýsköpunnar í ferðaþjónustu í borginn og ég vona að Reykjavíkurborg geti haldið áfram að styðja og hvetja fyrirtæki og einstaklinga með ferskar og góðar hugmyndir.

Glæsilegt að fá Þórey

Óska Þórey til hamingju með nýja starfið. Hún mun eflaust sinna því vel eins og öðru sem hún tekur sér fyrir hendur. Veit að hennar er sárt saknað úr hönnunargeiranum þar sem hún hefur látið kveða að sér síðastliðið ár. Það er fengur fyrir sjálfstæðisflokkinn að fá hana til starfa.

Ráðin kosningastjóri Sjálfstæðisflokksins

Reykjavík hlýtur viðurkenningu fyrir nýsköpun í fjárhagsáætlunarvinnu

Frábær árangur Hönnu Birnu borgarstjóra og Óskars Bergsonar formanns borgarráðs kristallast í þessum verðlaunum. Þetta er eitthvað annað en það sem við sjáum ríkisstjórnina gera þrátt fyrir að þeim hafi ítrekað verið bent á að vinna á sömu leið.

Hér er fréttatilkynningin:

Ný vinnubrögð við fjárhagsáætlun Reykjavíkurborgar tilnefnd til nýsköpunarverðlauna Eurocities samtakanna

Reykjavíkurborg hefur verið tilnefnd til verðlauna Eurocities fyrir nýbreytni við fjárhagsáætlunarvinnu Reykjavíkurborgar fyrir árið 2009. Verðlaun samtakanna eru í flokknum nýsköpun (Innovation) og er Reykjavíkurborg ein þriggja borga sem tilnefndar eru í þessum flokki.

Hanna Birna Kristjánsdóttir, borgarstjóri segir ánægjulegt fyrir Reykjavíkurborg að vera tilnefnd til verðlauna fyrir ný vinnubrögð. „Þessi tilnefning Eurocites er mikil viðurkenning á þeim nýju vinnubrögðum sem Reykjavíkurborg hefur staðið fyrir og veitir okkur hvatningu til áframhaldandi góðra verka.“

Tilnefnt verkefni Reykjavíkurborgar var hluti af viðamikilli hagræðingarvinnu vegna fjárhagsáætlunar fyrir árið 2009 þar sem leitað var til starfsfólks Reykjavíkurborgar um nýjar lausnir. Skipulagðar voru vinnustofur með starfsfólki þar sem staða borgarinnar var kynnt ítarlega og hvatt til nýrra lausna undir kjörorðinu; sparnaður án niðurskurðar. Alls tóku hátt í 3000 starfsmenn þátt í þessari vinnu og fram komu um 1500 tillögur til hagræðingar. Af þeim komu strax til framkvæmda um 300 þeirra og enn er verið að vinna úr fjölda hugmynda og verkefna.

Nýmæli er í íslenskri stjórnsýslu að leitað sé eftir svo víðtæku liðsinni starfsfólks vegna fjárhagsáætlunar og þeim sé um leið veitt tækifæri til að leggja sitt af mörkum við að gera borgarreksturinn sem hagkvæmastan. Tillögurnar sem bárust voru stórar og smáar en eiga það allar sameiginlegt að endurspegla þann mikla metnað sem starfsfólk hafði fyrir verkefninu. Leiðarljós starfsfólks við gerð hagræðingartillagnanna var að þær væru í samræmi við aðgerðaráætlun, sem samþykkt var einróma í borgarstjórn, og kæmu ekki niður á grunnþjónustu borgarinnar, störfum eða gjaldskrám.

Eurocities samtökin eru samtök Evrópuborga og á ári hverju eru veitt verðlaun sem nefnast Áskoranir í borgum – sjálfbærar lausnir (Urban challenges – sustainable solutions). Verðlaunin skiptast niður í þrjá flokka og eru þrjár borgir tilnefndar í hverjum. 32 verkefni frá 25 borgum fengu umfjöllun dómnefndar, sem tilnefndi níu borgir þar á meðal Reykjavíkurborg. Í flokki nýsköpunar eru auk Reykjavíkurborgar tilnefndar borgirnar Malaga á Spáni og Utrecht í Hollandi. Verðlaunin verða afhent á aðalfundi Eurocities – samtakanna í Stokkhólmi þann 26. nóvember nk.

VG og mótmælendur

 

Steingrímur gat komið í veg fyrir söluna en gerði það ekki - af hverju eru ekki gerð köll að honum?

Steingrímur gerir sér eflaust grein fyrir því að ekki er verið að selja auðlindir en honum finnst auðvitað bara gaman að fá mótmælendur á pallana enda orðin leikin í því. 

Hróp gerð að borgarstjóra

Auðlindir eru í eigu opinberra aðila. Enginn er að selja þær.

Bendi á góða grein Árna Sigfússonar og Böðvars Jónssonar í Morgunblaðinu í dag.

Í greininni kemur meðal annars fram:

Að auðlindirnar sjálfar eru í opinberri eigu skv. lögum og ekki er verið að selja þær þó að hlutir í félaginu HS Orku færist á milli aðila.

Að öll sú framtíðarorka sem HS orka aflar á umræddu landi á Suðurnesjum fer í atvinnuuppbyggingu á Suðurnesjum.

Að engu breytir hvort útlendingar eða Íslendingar eiga fyrirtækið, samningar um nýtingu orkunnar standi.

 

 

Hvernig nýttu Vinstri græn frestinn? Og hvar stendur Samfylkingin?

Orkuveitunni var fyrir löngu gert samkvæmt samkeppnislögum að selja hlut sinn í HS Orku.  Í sex mánuði hefur verið auglýst eftir tilboðum og þegar frestinum lýkur liggur eitt tilboð á borðinu - tilboð Magma Energy.

Fyrir 10 dögum tóku loks Vinstri græn við sér og vilja reyna að freista þess að finna innlenda kaupendur! Hvar voru þau í sex mánuði! Þetta tókst ekki enda lítill stuðningur eða geta til slíks fyrir hendi hjá innlendum fjárfestum og reyndar skil ég ekki viðbragðsleysi fjármálaráðherra ef þetta er honum svona mikið hjartans mál.

Samfylkingin, samstarfsflokkurinn í ríkisstjórn getur varla verið á móti því að fá erlent fjármagn inn í landið enda haldið því framítrekað aðein meginástæða þess að ganga í Evrópubandalagið sé til vinna traust erlendra fjárfesta. Þá finnst mér skrítið að lesa það að rökin fyrir því að halda því fram að tilboðið sé óhagstætt fyrir Orkuveituna taki ekki mið af því sem hér hefur átt sér stað, hlutabréfamarkaðurinn hrundi en samt á að miða við stöðuna eins og hún var fyrir hrun.

Ég get ekki séð annað en tilboð Magma sé hið besta mál og til hagsbóta fyrir Reykvíkinga.

Þeir sem ekki eru sáttir, ættu að leita skýringa hjá ríkisstjórninni á viðbragðsleysi hennar - af því mætti jafnvel halda fram að þau vonuðu að enginn hefði áhuga á að fjárfesta á Íslandi.

Tilboðið óhagstætt fyrir OR

Menning er mannrækt

Í dag var samþykkt í borgarstjórn endurskoðuð menningarstefna Reykjavíkurborgar til ársins 2012. Verkefnið hefur verið gífurlega viðamikið og meira en ár er síðan framkvæmd hófst en árið 2007 fór verkefnið inn á starfsáætlun menningar – og ferðamálaráðs fyrir árið 2008.

Framkvæmd verkefnisins einkenndist af miklu samráði og eindreginn vilji var til samráðs við almenning.  Við endurskoðun stefnunnar var leitað samráðs við ýmsa aðila. Haldnir voru 2 stærri samráðsfundir snemma vors 2008, þar sem fjölbreyttum hópi fólks var boðið að taka þátt í hugarflugsvinnu með framtíðarsýn menningarlífs Reykjavíkur í huga og í framhaldi af því störfuðu nokkrir hópar að hugmyndavinnunni.

Þegar drög að markmiðum og leiðum stefnunnar höfðu verið mótuð í lok nóvember 2008, voru þau send til ýmissa hagsmunasamtaka og menningarstofnana í Reykjavík, hverfisráða, íbúasamtaka, ásamt annarra sviða Reykjavíkurborgar og kallað eftir athugasemdum. Einnig voru drögin birt á vef Reykjavíkurborgar og almenningur hvattur til að tjá sig um drögin þar.

En víkjum þá að innihaldi stefnunnar. Hvað hefur breyst frá fyrri stefnumörkun? Nefna má helstu atriðin, í fyrsta lagi er búið að gera stefnuna mun aðgengilegri, hún er meira útskýrandi en áður var sem er verulega til bóta þar sem fyrri stefnumörkum var nokkuð knöpp.

Í öðru lagi er mikil viðurkenning falin í stefnunni, sem lýtur að því að viðurkennt er að menningarlífið í borginni sé mikilvægur hluti efnahags- og atvinnulífs borgarinnar og bæta þurfi úr sýn á hagræn áhrif menningar á samfélagið. Menning er það afl sem eykur lífsgæði. Í menningunni felast auðævi þjóðarinnar ekki síður en í öðrum atvinnugreinum.

Í þriðja lagi er stefnan að ákveðnu leiti “afskiptasöm” og fjallar um aukið samráð í borginni um hvernig hægt er að vinna að verkefnum í samráði og samstarfi  milli sviða, ráða, stofnana og annarra aðila.

Yfirskrift menningarstefnunnar er Menning er mannrækt og leiðarljós hennar er; Reykjavík eflist sem höfuðborg menningar í landinu. Sjálfsmynd borgarinnar byggi á menningararfi, frjórri hugsun og frumkvæði. Menningarlífið einkennist af fjölbreytni og virkri þátttöku íbúa og gesta.

Stefnan skiptist í 8 eftirfarandi kafla:

1. Auðlind sem byggt er á til framtíðar
2. Börn og menningaruppeldi
3. Menningarstofnanir Reykjavíkurborgar
4. Listir
5. Samkennd og jafnræði
6. Umhverfi og saga
7. Alþjóðleg menningarborg
8. Þáttur menningar í stjórnkerfi Reykjavíkurborgar   

Hvet ykkur til að kynna ykkur menningarstefnuna skjalið er hér. 

Áfram lægstu leikskólagjöld á landinu í Reykjavík

Fjölmiðlar hafa fjallað um leikskólagjöldin í Reykjavík í gær og í dag.

Eins og ég hef bloggað um áður höfum við í Reykjavík verið í mikilli og góðri vinnu til að finna leiðir til að mæta auknum kostnaði vegna efnahagsástandsins og gæta þess að við getum tryggt grunnþjónustu við borgara og draga frekar úr viðbótarþjónustu. 

Leikskólabörn í Reykjavík dvelja langflest innan við 8 klukkustundir á dag. Margir leikskólar hafa þó boðið upp á að foreldrar geti haft börnin einni eða einni og hálfri klukkustund lengur til viðbótar. Nú hefur leikskólaráð ákveðið að halda áfram að veita viðbótarþjónustuna en nú gegn raunkostnaði við gæslu barnsins. Þessari ákvörðun er slegið upp sem æsifregn í fjölmiðlum um að borgaryfirvöld séu að brjóta loforð sín. Það er hreinlega ekki rétt og ég bið fólk að kynna sér málið betur. Einhvers staðar þarf að mæta aukinni þörf sem skapast vegna erfiðleika hjá fjölskyldum s.s. fjárhagsaðstoð og annað slíkt og í því samhengi er þetta að mínu mati skynsamleg og réttlát leið.