Hrikaleg niðurstaða í borginni

Ótrúlegt að pólitískir fulltrúar sem taka ekki betur á rekstri borgarinnar telji sig hafa eitthvað þangað að gera - þeir forgangsraða ekki og skilja ekki að það þarf að taka á honum stóra sínum svo kerfi belgist ekki út. Að þeirra mati er sanngjarnt að kerfið belgist út á kostnað borgara.

Útsvar í botni, stórfelldar og ósanngjarnar hækkanir Orkuveitunnar (tala nú ekki um að hækka meira þann lið sem ekki er hægt að kaupa annars staðar) og hækkanir á öðrum gjöldum. 

A hluti er rekinn með 2,8 milljarða króna halla á meðan áætlun gerði ráð fyrir 66 milljónum í hagnað. Hagræðingarhugmyndir hafa engu skilað.

Hversu lélegt er þetta? 

 

 

 

Læt fréttatilkynningu okkar fylgja hér fyrir neðan:

Fréttatilkynning borgarstjórnarflokks Sjálfstæðisflokksins:

Borgarbúar greiða fyrir stóraukin rekstrarkostnað kerfisins,

- Aukin skattheimta, skuldir aukast, lítið aðhald í rekstri, áætlanir standast ekki og hagræðingar sem ekki skila neinum ávinningi

Ársreikningur Reykjavíkurborgar var lagður fram á fundi borgarstjórnar í dag.  ,,Niðurstöður reikningsins staðfesta mun lakari afkomu en áætlanir gerðu ráð fyrir, ónógt aðhald, ófullnægjandi árangur í hagræðingu og almennt ranga forgangsröðun í þágu kerfisins en á kostnað fólksins,“ segir Hanna Birna Kristjánsdóttir oddviti Sjálfstæðisflokksins.

Helstu niðurstöður ársreikningsins eru að rekstrarniðurstaða A-hluta er neikvæð um 2.808 mkr en áætlun gerði ráð fyrir að hún yrði jákvæð um 66 mkr.  Niðurstaðan er því verri en gert var ráð fyrir, sem nemur 2.874 mkr.  Sama þróun er í samstæðunni, A- og B- hluta, en þar er rekstrarniðurstaðan neikvæð um 4.675 mkr en átti að vera jákvæð um 3.400 mkr.  


Endurspeglar ár af mörgum röngum ákvörðunum

Hanna Birna segir ársreikninginn endurspegla ár af mörgum röngum ákvörðunum, hversu illa áætlanir meirihlutans standast og hversu lítill árangur hefur náðst í hagræðingu. Skatttekjur borgarinnar aukast um 16% á milli ára, sem þýðir að ætla megi að borgarbúar séu að greiða rúmlega 3.000 mkr meira í skatta en í fyrra.

Á sama tíma eykst rekstarkostnaður verulega á milli ára, samhliða því sem hann er mun hærri en áætlanir gerðu ráð fyrir. ,,Þannig vex kerfið á kostnað borgarbúa sem þurfa einmitt á því að halda að greiðslubyrði þeirra minnki. Borgarbúar líða fyrir það stefnu- og alvöruleysi sem ríkt hefur við stjórn borgarinnar á þessu kjörtímabili. Til að mæta þessum vexti í kerfinu seilist meirihlutinn stöðugt dýpra í vasa borgarbúa og lætur þá greiða fyrir eigið stjórnleysi með stóraukinni skattheimtu,“ segir Hanna Birna og bætir því við að  ársreikningurinn beri þannig ekki með sér góðar fréttir fyrir borgarbúa en staðfesti þá miklu gagnrýni sem verið hefur á fjármálastjórn meirihlutans.

Hanna Birna segir þennan viðsnúning til hins verra í rekstri borgarinnar og það hversu illa allar áætlanir standist, krefjast þess að meirihlutinn tileinki sér önnur og betri vinnubrögð við fjárhagsáætlunagerðina. ,,Borgarbúar eru einfaldlega að gjalda fyrir ranga forgangsröðun og vond vinnubrögð þessa meirihluta, samhliða því sem ársreikningurinn staðfestir að meintar hagræðingaraðgerðir meirihlutans skila ekki árangri, enda unnar án nokkrus samráðs við íbúa, starfsfólk eða kjörna fulltúa.“


Skuldir borgarinnar aukast um 56% frá 2009

Það er ekki eingöngu rekstrarkostnaður sem fer úr böndunum heldur hefur skuldsetning borgarinnar aukist um 56% á tveimur árum. Uppgreiðslutími lána fer hækkandi en árið 2009 hefði það tekið borgina 2 ár að greiða niður skuldir sínar en í lok árs 2011 tekur það borgina 5 ár að greiða niður skuldir. Þetta er áhyggjuefni þar sem að aðhald í rekstri borgarinnar er lítið og því gæti skuldaaukning orðið töluverð á næstu árum.


Umdeildar hagræðingaraðgerðir skila engu – rekstrarkostnaður menntasviðs eykst um 10%

Umdeildar hagræðingaraðgerðir í grunnskólum og leikskólum borgarinnar eru ekki að skila fjárhagslegum ávinningi.  Þetta sést best þegar litið er til þess að í upphaflegri áætlun var gert ráð fyrir rekstrarkosnaði sem næmi 18,3 milljarði en raunkostnaður varð 19,9 milljarður eða 9% aukning á kostnaði.  Þetta staðfestir að það sem meirihlutinn hefur boðað sem helstu hagræðingaraðgerðir sínar hafa engum árangri skilað.

Úttekt á söluferli OR

Eftirfarandi tilkynningu var send frá Sjálfstæðisflokknum í Reykjavík vegna þess ótrúlega sem átti sér stað þegar eignir OR voru seldar í laumi. Tilkynningin var send á fjölmiðla í gær að borgarráðsfundi loknum. 

"Borgarfulltrúar Sjálfstæðisflokksins og Vinstri grænna óskuðu eftir því  á borgarráðsfundi sem var að ljúka að innri endurskoðandi Reykjavíkurborgar og borgarlögmaður fari yfir söluferli vegna eignarhluta í Enex Kína og Envent Holding.  Óskað er eftir úttektinni þar sem staðfest hefur verið að OR seldi eignarhluti í þessum félögum án auglýsingar og eðlilegra upplýsinga til stjórnarmanna í Orkuveitunni.  

Beiðni borgarfulltrúa Sjálfstæðisflokksins og Vinstri grænna í heild sinni:

Beiðni um úttekt á vinnubrögðum OR vegna sölu opinberra eigna
 

    Staðfest hefur verið að OR seldi eignarhlut REI í tveimur félögum (Enex Kína og Envent Holding) án auglýsingar og eðlilegrar upplýsingar til stjórnarmanna í OR og kjörinna fulltrúa.   Þar sem stjórnendur fyrirtækis og fulltrúar meirihlutans hafa svarað fyrir þessa aðgerð með þeim hætti að þetta standist alla skoðun, samþykktir og reglur, óska borgarráðsfulltrúar Sjálfstæðisflokks og Vinstri [græn] eftir sérstakri úttekt á sölunni.
     
    Í þeirri úttekt er óskað eftir því að innri endurskoðandi skoði ferlið með hliðsjón af samþykktri skýrslu stýrihóps um málefni OR og REI; ítrekuðum ábendingum umboðsmanns Alþingis; stjórnsýsluúttekt innri endurskoðandi frá september 2008; bókunum og samþykktum eigenda og stjórnar OR um meðferð slíkra ákvarðana; og sérstökum verklagslegum stjórnar OR frá nóvember 2010.  Einnig er óskað eftir því að skoðað verði hvort ætla megi að slíkt ferli án opinberrar auglýsingar hafi skilað fyrirtækinu fullnægjandi verði fyrir umræddar eignir.  Mikilvægt er einnig að fram komi hvort það sé ásættanlegt að sömu starfsmenn OR fari fyrir því að réttlæta og rökstyðja ákvörðunina og tóku hana og framkvæmdu sem stjórnarmenn í dótturfélagi OR.   Að auki fylgi úttektinni álit borgarlögmanns á lagalegri stöðu málsins og þeim skýringum forsvarsmanna OR að ekki hefði verið  hægt að vinna málið með öðrum hætti."

Ótrúlegt - Eignir Orkuveitunnar Enex og Envent Holding seldar í laumi

Grafalvarlegar athugasemdir frá borgarfulltrúum Sjálfstæðisflokksins og borgarfulltrúum Vinstri grænna við það að eignir Orkuveitunnar hafi verið seldar nánast í laumi komu fram í umræðum í borgarstjórn rétti í þessu. Þetta er ótrúlegt miðað við sögu OR og REI.  Ljóst er að meirihlutinn hefur algjörlega hundsað athugasemdir sem Umboðsmaður Alþingis gerði um verklag við sölu eigna ásamt því að fara gegn eigin samþykktum í kjölfar þeirra athugasemda.  

 Algjörlega ljóst er að eignir Orkuveitunnar voru seldar án þess að farið væri eftir samþykktum né verklagsreglum.Eftirfarandi er fréttatilkynning borgarfulltrúa Sjálfstæðismanna:

Málefni Orkuveitu Reykjavíkur voru rædd á borgarstjórnarfundi í dag.  Tilefni umræðunnar eru upplýsingar um að OR hafa selt eignarhluta sinn í Enex Kína og Envent Holding án auglýsingar.   

Hanna Birna Kristjánsdóttir oddviti Sjálfstæðisflokksins í borgarstjórn sagði málið grafalvarlegt og bæri þess merki að hvorki Orkuveitan né meirihlutinn í Reykjavík, hefði skilning á mikilvægi þess að fyrirtækið starfi í samræmi við góða stjórnsýslu og skyldur sínar sem fyrirtæki í almannaeigu.   Hún minnti á ítrekaðar samþykktir borgarráðs, borgarstjórnar og stjórnar OR um önnur vinnubrögð.  Hún minnti borgarstjórn einnig á ábendingar og athugasemdir umboðsmanns Alþingis, þar sem áform um sölu opinberra eigna án auglýsingar voru átalin og fylgt var eftir með einróma samþykkt borgarstjórnar um að slíkir starfshættir væru óásættanlegir.

    ,,Það sem nú hefur verið opinberað um þessa sölu er klárlega í algjöru ósamræmi við þetta allt.  Það er auðvitað með hreinum ólíkindum, eftir allt sem á undan er gengið í málefnum þessa fyrirtækis, að það skuli nú selja opinberar eigur almennings án auglýsingar. Ekki aðeins er það í ósamræmi við það jafnræði sem verður að gilda við sölu opinberra eigna, svo allir áhugasamir geti gert tilboð, heldur hlýtur það að vera í algjörri andstöðu við hagsmuni fyrirtækisins um að hámarka söluvirði eigna fyrirtækisins. ´´  


Hanna Birna vakti einnig athygli á því að málið hefði ekki verið formlega samþykkt af stjórn OR, undraðist að hvorki borgarstjóri né meirihlutinn hefði tekið á því með nokkrum hætti síðan það varð opinbert og krafði borgarstjóra um skýr svör.  ,,Á sínum tíma sakaði Dagur B. Eggertsson stjórnendur Orkuveitu Reykjavíkur um að það sem hann kallaði ,,brunaútsölu í bakherbergjum" þegar til stóð að selja eignir án opinberrar auglýsingar.   Núverandi meirihluti verður að svara því hvort síkt er á ferðinni nú.  Það er alfarið á ábyrgð borgarstjóra og núverandi meirihluta að fylgja eftir samþykktum og verklagsreglum.  Í þessu tilfelli var það ekki gert, sem krefst nákvæmrar skoðunar, skýrra svara og ábyrgðar. "

Sameiningar skóla í Reykjavík

Á síðasta borgarstjórnarfundi á þriðjudaginn 7. febrúar urðu heitar umræður um sameiningarmálin í Reykjavík. Sjálfstæðismenn gagnrýndu vinnubrögð meirihlutans harðlega enda um algjört sýndarsamráð að ræða, hér hefur meirihlutinn verið að kynna sínar tillögur en ekki tekið tillit til þess sem foreldrar og fagfólk hefur að segja.

Þetta bréf sem barst okkur pólitískum fulltrúum í Reykjavík segir allt sem segja þarf. Bréfið sendi Guðmundur Sigurðsson og með hans leyfi birti ég bréfið hér.

"Ég sem kjósandi í Reykjavík, íbúi Hamrahverfis og jafnframt foreldri  barns í Hamraskóla óska eftir að þú hafir aðkomu að málum Hamraskóla varðandi sameiningarmál í sunnanverðum Grafarvogi.
 
Gífurleg óánægja ríkir meðal foreldra barna í skólanum með fyrirhugaðan flutning unglingadeildir yfir í Foldaskóla.

 Samkvæmt samstarfsyfirlýsingu Besta flokksins og Samfylkingarinnar varðandi lýðræði og þátttöku er talað um að samráð verði haft við íbúa og foreldra í skipulags-, umhverfis- og skólamálum, það gert markvissara og stutt við aðkomu þeirra að lykilákvörðunum.  Einnig var talað um að draga úr miðstýringu og auka sjálfstæði hverfanna með eflingu hverfaráða, hverfatengdar þjónustu og forgangsröðun í rekstri innan hverfis. Hvar eru efndirnar??????
Að mati foreldra hefur samráð algerlega skort, samtal er ekki sama og samráð!
 
Rökin fyrir sameiningunni eru að það eiga að sparast 28,5miljónir árið 2013.
Það eru samtals 139  nemendur sem áætlað er að flytjist í unglingadeild árið 2014 sem gerir 205 þúsund á hvern nemanda. Við fáum ekki sundurliðun á þessu og á fundi borgarstjórnar í Ráðhúsi Reykjavíkur þriðjudaginn 7. febrúar 2012 gat Oddný Sturludóttir ekki frætt aðra borgarfulltrúa um það. En hafði mörg og fögur orð um hvað allir væru duglegir og jákvæðir en mættu að sjálfsögðu hafa aðra skoðun eins og alltaf er. Hafa aðra skoðun á hverju spyr ég??
 
Faglegu rökin eru að í safnskóla er hægt að bjóða upp á fleiri valgreinar fyrir nemendur og stuðla þar með að aukinni sérhæfingu kennara. Þannig má í auknum mæli koma til móts við þarfir sérhvers nemanda.

Sérdeild í Hamraskóla verður lögð niður með afleiðingum sem engin getur ímyndað sér hvaða afleiðingar hafa fyrir þessa mjög svo brothættu nemendur  sem aðrir nemendur í Hamraskóla hafa tekið í sinn hóp með góðum árangri. Í stýrihóp hafa kostir og gallar stórra unglingadeilda mikið verið ræddir og eins hvernig starfinu í Hamraskóla og Húsaskóla verði fram haldið án unglingadeilda. Við þessum hugleiðingum fáum við enginn svör einnig höfum við beðið um að fá að vita hvaða fagaðilar hafa mælt með þessu. Sumir foreldrar eru þá komnir með börn í tvo grunskóla með því óhagræði sem af því hlýst. Þá má búast við að þau 50-60 börn úr Hamrahverfi verði í auknu mæli keyrð í skólann með þeim ókosti sem það hefur í för með sér svo sem eldsneytiskostnaður umferðar þungi og ég tala nú ekki um mengun. Foreldrar hafa valið sér þetta hverfi með þeim kostum og göllum sem það býður uppá, og hefur lítill fámennur skóli verið talinn kostur.  Þá má nefna að Hamraskóli hefur komið mjög vel út í kennslu í samanburði við aðra skóla og tel ég það vera skylda ráðamanna að viðhalda þeim góða árangri sem þar hefur náðst.
 
Ég geri þá kröfu til Besta flokksins og Samfylkingarinnar að standa vörð um okkar ágæta skóla og tryggja velferð barna okkar með því  að fallið verði frá þeirri ákvörðun að flytja unglingadeild Hamraskóla í Foldaskóla.
 
NB: Það var sorglegt að hlusta á umræður á áðurnefndum fundi borgarstjórnar í Ráðhúsi Reykjavíkur þriðjudaginn 7. febrúar 2012 ar sem borgarfulltrúar minnihlutans  spurðu spurninga og fulltrúar meirihlutans höfðu mörg og falleg orð um ekki neitt."

Kerfið verndað á kostnað íbúa - 5 ára skatta og gjaldastefna

Birti hér fjölmiðlatilkynningu frá Sjálfstæðisflokknum í borgarstjórn:

Meirihluti Besta flokksins og Samfylkingar lagði í dag fram frumvarp að fimm ára fjárhagsáætlun fyrir Reykjavíkurborg. Í umræðum um frumvarpið kom fram að ekki er um neina pólitíska stefnumótun að ræða heldur einungis framreikning fyrirliggjandi fjárhagsáætlunar. Spurningunum um það hvert stefnt sé í Reykjavík næstu fimm árin, hvað við þurfum að gera til að ná því markmiði og hvenær okkur gæti tekist það, er í engu svarað i frumvarpinu. Þannig er borgarbúum ekki veitt sú framtíðarsýn og það sameiginlega markmið sem kallað hefur verið eftir.

Spurningum um það hver hafi leitt vinnu vegna frumvarpsins, hvort það sé unnið af kjörnum fulltrúum eða embættismönnum var svarað þannig að ,,fjármálastjóri hefði borið þessa vinnu á höfði sínu og herðum" og kjörnir fulltrúar lítið sem ekkert haft af því afskipti. Borgarstjóri sem ber ábyrgð á frumvarpinu sagðist þannig hafa gert það eitt að fylgjast með þessari vinnu og funda með fjármálastjóra vegna stöðu þess.

Borgarfulltrúar Sjálfstæðisflokksins gagnrýna harðlega þessi vinnubrögð og telja að vegna þeirra sé fimm ára áætlunin hvorki nægilega vel undirbúin né nægilega vel unnin. Alla pólitíska forystu, framtíðarsýn og ábyrgð skorti af hálfu meirihlutans, auk þess sem enginn borgarfulltrúi hafi séð plaggið fyrr en 2 dögum fyrir umræðuna þrátt fyrir að þessi vinna hafi skv. yfirlýsingum átt að liggja fyrir i lok september.
Hanna Birna Kristjánsdóttir, oddviti borgarstjórnarflokksins sagði í dag að meirihlutinn virðist án nokkurrar umræðu færa sitt lýðræðislega umboð frá borgarbúum til embættismanna, sem sé enn eitt dæmið um það hvernig forgangsröðunin í Reykjavík er á kostnað fólksins en fyrir kerfið.

Við teljum að með forgangsröðun sinni sé Reykjavík að vernda kerfið á kostnað fólksins og okkur finnst það ekkert betri aðferð þegar henni er beitt fimm ár í röð, eins og í fyrirliggjandi áherslum, en þegar henni er beitt eitt ár í einu. Og í þessari áætlun er ekkert sem bendir til þess að Reykjavíkurborg hyggist láta af slíkri skattheimtu eða stefni að því að bjóða íbúum sínum lægri skatta en í öðrum sveitarfélögum. Skilaboðin til almennings í þessu plaggi eru því nákvæmlega þau sömu og þau hafa verið allt þetta kjörtímabil – kerfið þenst út á kostnað ykkar og það stendur ekki til að breyta því

Hinn stefnulausi, kerfislægi einokunarmeirihluti.

Nú liggur fyrir fjárlagafrumvarp fyrir árið 2012 hjá Besta og Samfylkingu í Reykjavík hér eru nokkur orð um það.

Hagræðing hefur ekki átt sér stað

Niðurstaðan er sú að enn skal hækka gjöld á íbúa í algjöru stefnuleysi. Útsvar var hækkað í botn og skatttekjur voru 1,6 milljarði hærri en áætlað var!! Ekkert liggur fyrir um af hverju meirihlutinn telur svona mikilvægt að halda áfram að safna fé frá íbúum - að vissu leyti má reyna að skilja þetta að því leyti að þau hafa ekki getað hagrætt eins og þau töldu sig geta. Í stað þess að lækka skatta og gjöld er þeim haldið í botni svo að hvatinn til að hagræða er hverfandi. 

Íbúar borga þegar fasteignamat hækkar en líka þegar fasteignamat lækkar

Fyrir ári síðan ákvað Sambesti flokkurinn að leyfa íbúum ekki að njóta þess að fasteignamat hafði lækkað og skattar á fólk í leiðinni. Mjög furðulegt samkomulag við íbúa að þeir borgi brúsan þegar fasteignamatið hækkar en fái engar lækkanir þegar fasteignamat lækkar. Í stað þess var ákveðið að skattar yrðu hækkaðar með þeim forsendum að þeir skiluðu enn inn sömu krónutölu og þeir höfðu áður skilað.  Þessi hugsunarháttur endurspeglar mjög hversu kerfislægt meirihlutinn vinnur.

Einokunargjaldskrár hækka mest

Einnig er athyglisvert að sjá að enn skal hækka gjaldskrá OR. Þrátt fyrir að þar skuli hagrætt verulega og fjárfestingum frestað skal nú hækka gjöldin á íbúa mest vegna þjónustu sem er ekki í samkeppni svo allir verði nú örugglega að borga. Hér sést best hversu mikilvæg samkeppni getur verið í þágu almennings.

 

Samfylking og Besti flokkur áhugalaus um atvinnumál í Reykjavík

Á borgarstjórnarfundi í gær kom glögglega í ljós að enginn áhugi er hjá Besta flokki og Samfylkingu að skoða hvaða áhrif fyrirhugaðar breytingar á kvótakerfinu hafa á atvinnumál í borginni. Í tvo mánuði hefur legið fyrir tillaga um að borgin geri úttekt á þessum áhrifum sem meirihlutinn hefur alltaf verið frestað. Maður spyr sig hvort menn telji þetta ekki hagsmunamál borgarinnar eða fyrir hvern þeir eru að vinna?

Eftirfarnadi er fréttatilkynning frá sjálfstæðisfólki í borgarstjórn:

Sjálfstæðisflokkurinn lagði fram tillögu á borgarstjórnarfundi í dag þar sem farið er fram á úttekt á áhrifum breytinga á fiskveiðistjórnunarkerfinu á atvinnulif í Reykjavík.  Einnig er farið fram á það að Reykjavíkurborg veiti Alþingi umsögn sína um málið með hliðsjón af hagsmunum Reykjavíkur.

Í umræðunum í borgarstjórn í dag benti Hanna Birna Kristjánsdóttir oddviti Sjálfstæðisflokksins á að tillaga um þessa úttekt hafi verið flutt í borgarráði í lok júní, en hafi nú verið í frestun á þeim vettvangi í rúmlega tvo mánuði.  Á sama tíma hafa hagsmunaaðilar og mörg sveitarfélög sent Alþingi umsagnir sínar, þar sem bent er á ýmsa vankanta frumvarpsins og áhrif þess á uppbyggingu í atvinnulífi og lífskjör í landinu, þ.m.t. Reykjavík.  Hanna Birna sagði þetta aðgerðar- og afstöðuleysi meirihlutans bera  vott um ,,algjört áhugaleysi meirihlutans á brýnu atvinnumáli í Reykjavík, auk þess að vekja upp spurningar um hvort borgaryfirvöld er uppteknari við að verja áherslur ríkisstjórnarinnar en hagsmuni borgarbúa."
 
Hanna Birna benti einnig á mikilvægi sjávarútvegs fyrir Reykjavík, en um 20 % aflaverðmætis kemur til hafnar í Reykjavík.  ,,Sjávarútvegurinn er einn af stoðum reykvísks atvinnulífs. Borgaryfirvöldum ber skylda til að skoða áhrif þeirra umfangsmiklu breytinga sem boðaðar hafa verið og greina hvernig betur verði á málinu haldið.  Sé meirihlutanum alvara með því að búa atvinnulífi hér góð skilyrði, hlýtur samþykkt slíkrar úttektar að vera sjálfsögð og mikilvæg.  Að það taki meirihlutann marga mánuði að afgreiða slíka tillögu vekur furðu, ber þess merki að meirihlutinn vill ekki ræða málið og skaðar með því hagsmuni borgarbúa."

Að takast á við félagslega vanda í Reykjavík

Fjöldi þeirra sem fær fjárhagsaðstoð frá Reykjavíkurborg hefur aukist um 30% milli ára og um 70% ef bornar eru saman tölur fyrstu ársfjórðunga þessa árs og ársins 2010. Þeir sem  njóta aðstoðarinnar eiga ekki rétt á atvinnuleysisbótum, hafa misst réttinn til bóta eða geta ekki verið á vinnumarkaði af einhverjum ástæðum. Margir eru síðar greindir sem öryrkjar og fá þá greiðslur úr almenna lífeyristryggingakerfinu.  Þá eiga námsmenn, sem hafa ekki verið á vinnumarkaði, ekki heldur rétt á atvinnuleysisbótum.  Nú njóta 1700 manns fjárhagsaðstoðar Reykjavíkurborgar.  U.þ.b. 70% þeirra eru 40 ára og yngri og þeim fjölgar mun hraðar en hinum eldri.  Þetta er alvarleg þróun, sem krefst þess að við stöldrum við, rýnum ástandið og leitum nýrra leiða.

Hækkun bóta og skilyrði um virkni.
Grunnfjárhæð til framfærslu hækkaði um síðustu áramót í Reykjavík.  Tekist var á um þessa hækkun.  Meirihluti Samfylkingar og Besta flokksins hækkaði bætur án þess að skoða hvernig  leggja mætti enn þyngri áherslu á virkniúrræði. Mun betri leið hefði verið að umbuna þeim, sem geta og vilja taka þátt í virkniverkefnum í stað þess að greiða bætur út skilyrðislaust. Með því hefði borgin mótað hvetjandi kerfi öllum til góðs.

Við sjálfstæðismenn höfum verið talsmenn þess að gera ætti kröfur til þeirra sem þurfa á fjárhagsaðstoð að halda, á sama hátt og gerðar eru kröfur til þeirra sem njóta atvinnuleysisbóta en þeir þurfa að vera í virkri atvinnuleit og með því er fylgst.  Engar slíkar kröfur eru gerðar til þeirra, sem fá fjárhagsaðstoð borgarinnar, fólki er boðin ráðgjöf og aðstoð sem margir þiggja ekki.  Þennan hóp þarf að okkar mati að hvetja af meiri krafti til að hann öðlist reynslu og hæfni til að komast  út á vinnumarkaðinn og verjast þeim doða og vonleysi, sem langvarandi aðgerðarleysi getur haft í för með sér. Annars staðar á Norðurlöndum hafa menn séð mikilvægi þess að forsenda bóta sé að vera virkur og taka þátt.

Breyttar aðstæður krefjast aðlögunar og nýrra úrræða.
Þegar félagslegir erfiðleikar eru til staðar hjá einstaklingum og fjölskyldum, opnast dyr að kerfi, sem bætir verulega fjárhagsstöðu þeirra og veitir aðgang að lausnum sem öðrum bjóðast ekki. Hér er t.d. um að ræða sérstakar húsaleigubætur, úthlutun félagslegs húsnæðis og aðgengi að heimildargreiðslum á grundvelli reglna Reykjavíkurborgar.

 

Mikil ásókn er að komast yfir "félagslegu línuna" eða viðmiðin þ.e. að teljast vera í félagslegum vanda enda er eftir nokkru að slægjast.  Svokallaðar sérstakar húsnæðisbætur eru 1.300 kr. fyrir hverjar 1.000 krónur, sem viðkomandi fær í húsaleigubætur og geta þær samanlagt orðið mest 70.000 kr. á mánuði eða 75% af leiguverði. Oft á tíðum gengur illa að finna leiguhúsnæði á almennum markaði, þannig að fólk leitar til sveitarfélagsins. Til þess að eiga rétt á félagslegu húsnæði er þörfin metin út frá aðstæðum hvers og eins, bæði félagslegum og fjárhagslegum.  Dæmi eru til um að framtak og frumkvæði til öflunar húsnæðis komi í veg fyrir aukinn rétt til bóta. Og fljótt sér fólk að það borgar sig lítið að nota sjálfsbjargarviðleitnina.

Nauðsynlegt er að velferðarkerfið breytist í takt við þann vanda, sem því er ætlað að leysa.  Vinnumarkaðurinn er gjörbreyttur, atvinnuleysi í borginni er u.þ.b. 10% (þegar atvinnulausir á fjárhagsaðstoð eru taldir með) og laun hafa lækkað verulega. Gæta þarf þess að sá hópur sem fær fjárhagsaðstoð frá sveitarfélaginu vegna atvinnuleysis festist ekki í viðjum hins félagslega kerfis. Mikilvægt er að því fólki standi öflug vinnumarkaðsúrræði til boða og ríkið tryggi rétt þeirra til vinnumiðlunarúrræða. Breyta þarf fjárhagsaðstoðarreglunum Reykjavíkurborgar, þannig að hægt sé að umbuna þeim sem vilja taka þátt í samfélagsverkefnum eða öðrum virkniúrræðum og ekki ætti að teljast eðlilegt að krefjast einskis frá bótaþegum. Ekki er verið að tala um að allir fái launuð störf heldur að þeir finni sér verkefni sem hentar áhuga þeirra og hæfni.  Þetta má gera í samstarfi við  hjálparstofnanir, hagsmunafélög, skóla og aðra aðila.  Slík þátttaka hvetur fólk til að koma sér út úr aðstæðum, sem það annars festist í til langs tíma. Aðalatriðið er að fólk sem getur bjargað sér sjálft festist ekki í viðjum félagslega kerfisins. Félagslega kerfið er  byggt upp til þess að hjálpa þeim sem ekki geta bjargað sér sjálfir eða hafa lent tímabundið í áföllum og nú er nauðsynlegt að verja það vegna gjörbreyttra aðstæðna á vinnumarkaði.

Greinin hér að ofan birtist í morgunblaðinu mánudaginn 30. maí 2011.

Árangur Hönnu Birnu og fyrrverandi meirihluta

Rekstrarniðurstaða borgarsjóðs fyrir árið 2010 var réttu megin við núllið eða skilaði 1.472 m.kr. hagnaði og sýnir svo ekki verður um villst að fyrrverandi borgarstjórnarmeirihluti var á réttri braut.

Það sem er svo merkilegt við þetta er að meðan hvaðanæva að streyma ábendingar um hversu slæmt það er að skattpína fyrirtæki og almenning í því ástandi sem nú einkennir efnahagslífið þá hefur núverandi meirihluti hins vegar farið þá leið til hins ítrasta.  Borgarsjóður skilar hagnaði á fyrra ári án skattahækkana og án þess að gjöld hafi hækkað, en hins vegar lagði nýji meirihlutinn áherslu á að nú yrði að skattapína til að vinna gegn slæmri stöðu borgarinnar, borgarsjóður skilar nú meira en skattahækkanirnar munu skila borgarsjóði á næsta ári. Á meðan störfin í einkageiranum þurfa að halda úti 2,5 manneskjum á þann hátt að með hverju starfi í einkageira gefst möguleiki á að halda úti 1,5 til viðbótar í opinbera geiranum (hvort sem um er að ræða launamenn eða þá sem þurfa að lifa á opinberum styrkjum) þá er þetta varhugaverð stefna. Velferðarkerfið byggir á atvinnurekstri - hvet ykkur til að lesa skoðun Viðskiptaráðs Íslands  sem kom út nú fyrr í maí.

 

 

Í ágúst 2010 vildu Jóhanna og Steingrímur ekki kaupa hlut OR í HS orku í stað Magma

Í ágúst fyrir einu og hálfu ári, þurfti Orkuveita Reykjavíkur skv. samkeppnislögum að selja hlut sinn í HS orku. Eftir að hafa haft 6 mánuði til að gera tilboð í hlut Orkuveitu Reykjavíkur í HS orku vildu Steingrímur og Jóhanna ekki kaupa hlutinn sem Magma falaðist eftir. Að frestinum liðnum fengu þau auka frest til að skoða málið en sáu ekki ástæðu til að kaupa bréfin og stöðva sölu til HS orku - en nú er þetta allt einhverjum öðrum að kenna, sjálfstæðisflokknum, Geir, Davíð og kannski Hæstarétti bara líka?